Rohrbacher Siegel aus dem Jahre 1516

   Heidelberg-Rohrbach.de

Kerweredd 2001

Home >Kultur  >Kerwe2001 >Kerweredd2001                        

Gustav Knauber am 6.7.2002

Gustav Knauber erhält die Heidelberger Bürgerplakette am 6.7.2002
von Oberbürgermeisterin Beate Weber

Alle Rechte der Kerweredd liegen beim Autor, Gustav Knauber.
Das komplette Kopieren und Veröffentlichen auf andere Web-Server ist nicht erlaubt. Auch das Ändern des Dokuments (Inhalt wie Format) ist nicht erlaubt, ebenso wie das Kopieren und Veröffentlichen von Teilen des Dokuments. Das wörtliche Übernehmen einzelner Dokument-Abschnitte in Form eines Zitats (mit Angabe der Web-Adresse www.heidelberg-rohrbach.de/kerweredd2001.htm) bedarf der vorherigen Zustimmung. 
Hierzu bitte eMail an: info@stadtteilverein-rohrbach.de. .

 

 

Kerweredd 2001 vum Kerweborschd Gustav Knauber am 1.9.2001 

 

 

Begrüßung

Eisch allminanner, die wu ihr sou zahlreich ums Rohrbacher Rothaus versammlt seid, gilt unser herzlischer Willkummensgruß zu unserer berihmde Rohrbacher Traditionskerwe 2001!
In den Gruß eigschlosse sin alle
- Eiheimische,
- Zugezorrene un
- Bsucher
uff unserer riesische Rohrbacher Gemarjung
- vun de Laamer Grenz drauß bis nei in d Markscheid un
- vum Bierheller Houf drowwe bis niwwer zum Helleschtaa!

Ja, unser Rohrbach isch grouß un reisch un gschischtlisch indressant un war bei de Eigemeindung 1927 en wertvolle Batze fer unser Stadt Heidelberg.

Uff Rohrbacher Gemarjung lieje nämlisch
- Alt Rohrbach mit seim
sehenswerde Ortskern,
- de Boxberg,
- de Emmertsgrund,
- de Haseleiser,
- s Gewann See,
- die Siidschtadt vun de Sickingerschtrooß bis an d Markscheid.
- die Ami-Siedlung bis an d Saarschtrooß nei,
- die Induschtriegebiede Siid un Bosseldorn un
- neierdings s Eichendorff-Forum un
- des nei zu verbauende Furukawa-Gelände, friher de Fuchs-Waggon.

Mir griiße ganz herzlisch
die Ehregäscht vun Bund, Land, Kummune, Schule, Vereine, Pfarreie un nadiirlisch alle Kerwegäscht aus noh un fern!
Die Kerweborscht Klaus Weirich un Gustav Knauber, unser Heidelberjer Weikeenischin aus Rohrbach, Larissa Winter, unser Kerwe-Käthsche un die gsamt Stadtdaalvereinsvorschtandschaft entbiede eisch en herzlische Gruß zu unserm dreidägische Volksfescht, zu unserer

 

Eileidung

Ich kenn en Ausschpruch: Kinner, Leit,
wie rasend schnell vergeht die Zeit!
Kaum dreht mer sich mol rischdisch um,
schun sin zwelf korze Muned rum.

Leit, glaabt mer's, s isch mer sou, als hedd
ich kerzlisch erscht e Redd geredd.
S liggt awwer doch e Johr dezwische.
Zwaadausend (2000) isch schun lang verblische,
un s laufend Johr brauch nimmi lang,
hängt's aa schun an de Debbischschtang.
Lebt eier Lewe, macht was draus,
wie schnell isch als de Offe aus!-


Heimatmuseum

S Museum mescht ganz schee Furore!
S werd immer meh zum Ziel erkore
vun Schule, Wanderer, Vereine,
Familie, keerschlische Gemeine,
vun Heimatforscher un sou weider.
Der Zuschpruch stimmt uns frouh un heider.
Ihr Kerwebsucher, froit eisch druff:
Morje isch s Museum uff!
Middags zwische zwaa un viere
kennt ihr's uugschteert inschpiziere.

An derre Stell mol Dank zu saare
all denne, wu schun Johr un Daare
fer "umme" im Museum schaffe,
uhne jemols zu erschlaffe,
isch mir e Bedirfnis heit.
S Ehreamt ehrt all die Leit,
wu sich selbschtlous angaschiere,
um was Gudes zu vollfihre.
Wer Luscht hot, mol zu uns zu kumme,
werd allzeit herzlisch uffgenumme.-

Kaan Metzger meh

Kaa M K S *, kaa B S E **
hewwe mir in Rohrbach meh!
Kaa Rindvieh werd meh bei uns gschlacht,
weil alle Metzger discht gemacht.
De ganz Auguscht war weit un breit
fer unser Metzger Urlaubszeit.
In Wirklischkeit sin's blouß noch "zwoo",
doch nitzt's uns nix, wann kaaner do.

Mer treibt uns, wie kann's annerscht sei,
uff die Art in die Groußmärkt nei,
odder in die Nochbarschaft,
wu kaa Summer-Schlachtloch klafft!
Fer d Zukunft kann ich blouß empfehle,
de Urlaub halt versetzt zu wähle,
norr um die Kundschaft zu erhalde,
sunscht frei nooch Geede ***: Ruhet ihr balde!-

* MKS = Maul- und Klauenseuche
** BSE = Rinderwahnsinn
*** Geede = Goethe

 

Drennung

In Rohrbach, unser Prodeschdande,
die lewe derzeit imme gschpannde
Verhältnis zu de Owrischkeit,
dann zwische Oscht un Wescht herrscht Streit.
Mer will, des derf mer offe saare,
de Chrischde-Eiheit an de Krare
un will die Evangelische
in bergwärts un in dälische,
in zwaa Gemeinde sischtlisch drenne!
Dogeje gilt's jetz aazurenne.

Mir wolle uhne Iwwerdreiwe
aa kinfdisch aa Gemeinde bleiwe.
Zwaa Geischtlische, des solle's sei.
Doch Schluß jetz mit de Spalderei!
Ja, Markus un Melanchthon zamme
wolle en Keil dezwische ramme
zwische Luther mit Rohrbach Wescht.
Mir awwer stehne im Glaawe fescht,
daß nix bassiert, was mir net wolle,
aa wann uns alle Parrer grolle.

Mir Weschtler lewe net im Pfersch,
aa uns gheert die Melanchthonkeersch,
bekannt als Rohrbachs Mudderhaus,
do schmeißt mer doch kaan Weschtler naus,
wann's den emol aus Luscht dut jucke
als Chrischt vum Berg ins Dal zu gucke.
Eidringlisch muß ich abbeliere,
den Plan, bei Gott, net auszufihre.

In Karlsruh sood mer desdeweje
die Planung schnell in d Schublad leje.
Mir sin - un schaffe mir uns Feind -
aa evangelischi Gemeind
un wolle des in Rohrbach sei.
Un Zwiedracht kummt erscht gar net rei!-


D Leischehall

Erfreilisch isch aus uns'rer Sischt:
Die Leischehall werd hergerischt,
werd drin un drauße uffboliert,
un s Dach werd rundrum mol saniert,
en Vorbau soll sie noch erhalde.
Doch zwaa Pladane, grouße, alde,
stehne scheins dem Plan im Weg.
Mer will sie fälle mit de Säg.

Des awwer kann un derf net sei.
Mer kerzt die Beem ganz aafach ei
un läßt sie, wie seit eh un je,
als Schmuckschtick uff em Keerschhouf steh,
die gheere, des isch jedem klar,
wie d Hall zum Keerschhoufsinvendar.
Ich muß ans Rothaus abbeliere,
uns an de Nas net rumzufihre
un rischt eidringlisch an d Verwaldung
mei Bitt jetz um die Beemerhaldung.

Ich redd de Stadt scharf ins Gewisse:
Mir wolle d Beem net misse misse,
sunscht gäb's, wie um die Drauerweid
dort uff em Schloß, en Zeidungsschtreit.
Dobei muß ich noch erwähne
- des gheert zu de Keerschhoufszene -
daß die Zufahrt eng durch Bisch
un die Fahrbahn dreckisch isch.
Die Wildnis hew ich lang bedracht
un hebb dodruff den Reim gemacht.
Des Thema isch erscht dann vum Disch,
wann die Zufahrt sauwer isch
un die Mauer frei vun Hecke
grad fer Audoabschtellzwecke.

S Feierwehrfescht

Im Johr zwaadausendaans (2001) war s Bescht
de Feierwehr ihr Juwelfescht!
Im Voraus hot mer jo geahnt,
daß d Feierwehr was Gudes plant.-
Dort uff em Kerweplatz, des Zelt,
war Treffpunkt vun de ganze Welt.
Aa Leit aus Rohrbach ware dort
oft haufeweis vun jed'rer Sort
un hewwe sich s Programm bedracht
dagsiwwer un bis dief in d Nacht.

Die Feierwehr hot aa bewisse,
daß gar kaa Engscht mir hawwe misse
un daß mer, wann's emol wu brennt,
mit ihrer Hilf fescht reschle kennt.
Die Iiwung vorrem Schulhaus drowwe
hot gut geklappt un war zu lowe.
Die Wehr hot kräfdisch spritze misse.
Zum Glick isch do kaan Schlauch gerisse,
sunscht hedd des Feier, uubezwunge,
s grouß Schulhaus un s ganz Dorf verschlunge.
Donooch war's Zeit, um uffzubresche,
de Riesedorscht im Zelt zu lesche..

De Feschtzug, der war sehenswert
mit aldem Feierlaadergfährt.
De Petrus hot sich korz bequemt,
hot Reje fer zwaa Stund gezähmt,
doch blouß, domit de Umzug numme
noch drucked an sei Ziel isch kumme.
E Episod noch ganz am Rand:
Uff Mundagowend war mer gschpannt.
E Grupp aus Feierwehrbeschtänd,
die sich "Die Alptraum-Buwe" nennt,
die hot s Klamauk-Programm gemacht.
Was hewwe do die Leit gelacht.
Erscht Ledderhouse, Waadesocke,
dann "Dridder Mann" mit Reemerglocke
un fascht zum Schluß drei zackische,
pausbackisch, runde, nackische
mit Strips durchzorrene Muschderärsch!

En Akt, e bißl iwwerzwersch.-
Do sescht e Fraa in meiner Näh:
Den aane Arsch hew ich schun gseh.
Ich glaab, daß ich net erre kann,
isch maan, der gheert meim Nochbarsmann!-


Eichendorff-Forum

Uff dem Gelände, friher Nanz,
entschteht was, s isch nix Halbs, nix Ganz's.
Dort werd des Areal verbaut,
wuvor's in Rohrbach Wescht uns graut.
Keend Eichedorff des Forum sehe,
er deed vor Gram im Grab sich drehe.
Beinanner, eng, verbringe ball
in Haiser wie en Haseschtall
zum Johresend viel neie Leit
en Daal vun ihrer Lewenszeit.
Un du ich an den Kaafpreis denke,
loß ich vor Schreck die Hudde henke.

Mer froogt sich, wammer's rescht bedenkt,
wuhii mer den Verkehrsschtrom lenkt,
wann alle Haiser mol belegt,
der Audokorso sich bewegt:
Dann misse mer d Fabrikschtrooß sperre,
um die Belaschdung zu entzerre,
um Stau un Gschtank noch Herr zu werre.
Do helft kaa Jammere un Plärre.
Jetz zeigt sich - un des knippldick:
Was dort fehlt, isch d Sickinger Brick;
S hängt de Stadt am Baa wie Blei,
Versaimdes holt sie grausam ei!

 

Seniorezentrum

Im Johr zwaadausendzwaa (2002) vielleischt
werd's wohr, daß Rohrbach des erreischt,
was annere seit langem hewwe:
E Zentrum soll's fer Alde gewwe!
Daß mir die allerletschde sin,
des waaß inzwische jedes Kinn.
Ausredde hii, Ausredde her,
noch draa zu glaawe fällt uns schwer.

Wann awwer wirklisch Wort werd ghalde,
dann danke des die viele alde
Leit, wu bei un um uns lewe,
die brauche sou e Zentrum ewe,
wu gsellisch sie verweile kenne.
Ich selwer gheer noch net zu denne.
Doch wann ich wu e Lesung hebb,
mei Mundart dort zum Beschde gebb,
spiir ich, sou e Senioredreiwe
kann uns net vorenthalde bleiwe.

Sin Gelder knapp, Ideje rar,
dann bleibt's vielleischt, wie's bisher war.
Dann sin vielleischt die nägschde Wahle
fer manschen eschde Hellequale.-

Spielmannsvereins-Hitt

Mein Abbell vum letschde Johr
hot manscher sischer noch im Ohr.
Um unser Spielleit hot sich's ghandlt.
Zum Gude hot sich des gewandlt.
Vum Hundeschportverein, die Hitt,
versorje jetz die Spielleit mit.

Im scheene Neibau-Inneraum
erfillt sich jetz en Mussiktraum.
Dort an de Brick zur Wolzelsgaß
mescht Mussikmache rischdisch Spaß.
E klaanes Grundschtick gheert dezu,
do kammer grille un hot Ruh,
steert nimmand, wann aus volle Kehle
e paar die Gawels nuff krakele.

Mer kann nooch Herzensluscht dort iiwe
sou zwische Weiberg, Kraut un Riiwe
un kann sich gut zu alle Zeite
uff Groußereignis vorbereite.
Uns froit's - un des mit Rescht un Fug -
sin stolz uff unsern Spielmannszug.-

Kreisverkehr

Unser Stadt, die isch schun wer,
isch neierdings fer Kreisverkehr,
um Amble un aa Strom zu spare,
dogeje wär jo nix zu saare.
Awwer Kreisl uff me Platz,
wu zu eng, sin fer die Katz.

Im Boxberg war er glei verschwunne.
Wie awwer isch's in Rohrbach hunne?
In de Heinrich-Fuchs-Strooß drunne
werre d Audofahrer gschunne,
weil ihrn Karre jeder Klasse
in den Mini-Kreis net basse.
Also fährt mer driwwer weg,
leischder kummt mer sou ums Eck
odder gradaus in de Eil
aus un in de Kolwezeil.

En Orde um sein Hals gheert ghenkt
dem, wu den Kreisl ausgedenkt
un uff die Strooß hot mole losse.
Geld isch scheins do fer dumme Bosse.


30-km-Zone

Mit Zone, wu mer "Dreißisch" fährt,
werd meischdens de Verkehr erschwert.
Der, wu mit Tempo "Dreißisch" schleischt,
heert, wie sein Hinnermann als kreischt.
Manschmol heert mer aaner brumme:
Dem gheert de Fihrerschei genumme!
Geneigt wär ich, glei auszuschteije,
um dem de "Voggl" mol zu zeije.

Awwer s bringt nix, loß sie sause,
im Grund genumme sin's Banause.
Doch "Dreißisch-Zone" zu reduziere,
des deed mer am Verkehrsfluß spiire,
deed de Nadur un jeder Brut
un schließlisch aa uns Mensche gut.


Rohrbach Markt

In Heidelberg lefft de Verkehr
an mansche Stelle ganz verquer.
De Rohrbach Markt, der isch un bleibt
e Mißgeburt, die jeden treibt
fascht zur Verzweiflung, glabbt mer's norre!
Oft umgebaut - un nix Gscheids worre!
Mer keend de Eidruck jo gewinne
als deede alle Amble spinne.

Kummt do dezu noch d Vorrangschaldung,
dann dräigt des bei zur Wutentfaldung.
Ich bin blouß geschpannt, was noch draus werd,
wann ball e Firma widder scherrt.
Dann sood die Stadt sich doch gedraue
un glei en Audotunnl baue.
Am Marktplatz wär's jetz häigschdi Zeit,
daß mer uns vum Verkehr befreit.


Rohrbach Markt - Loch in de Strooß

Im März, des hew ich selwer gseh,
do bleibt en grouße L K W
mit Hänger vor de B B B *
mit Riesekrach ganz pletzlisch steh.
Was war die Ursach fer den Halt?
En mederbraade, diefe Spalt!

Die Strooß, urpletzlisch nunnergsackt,
hot des volle Gfährt geknackt,
hot die Achse stark verborre,
dann isch's geje s Drottwar gflorre
un hot, ich war ganz entsetzt,
Gott sei Dank, kaan Mensch verletzt.

En Wasserrohrbruch, ganz dief drunne,
hot mer als die Ursach gfunne.
Alde Rohrbacher saare's offe,
do wär emol en Gang verloffe
vun de "Ros" uff d anner Seit.
Waaß dodriwwer d Stadt Bescheid?
* BBB = Badische Beamtenbank

Rothaus-Strooßepoller

Die Rothausschtrooß, in Volksbanknäh,
isch jetz mit Poller fescht verseh,
domit beim Penny-Handlsmarkt
grad gejeniwwer kaans meh parkt.
Do stehne sie, die Silwerschtänner
mit roud' un weiße Gfahrebänner.
Zu unserm Schutz sin die inschtalliert
un schun als Hundsbrunser äschdimiert.

Oft sin Audos, kammer saare,
ziemlisch weit uffs Drottwar gfahre.
Des war manschmol aig bedenklisch
fer Kinner un fer Leit, wu kränklisch.
Enger isch's jetz durch die Dinger,
doch isch d Uufallgfahr geringer.
Wann desweg manscher Birjer stehnt:
In Rohrbach simmer Kummer gewehnt.-


Flugplatz Paffegrund

De Flugverkehr im Paffegrund
der werd uns langsam doch zu bunt.
Die Flugzeig ziehje dief ihr Kreise
iwwer Rohrbachs Eiflugschneise.
Oft kammer, s läßt sich net verhehle,
die Kepf im Flugzeig deitlisch zähle.

Wann ich des seh, muß ich oft denke:
Was wär, bleibt do mol aaner henke
am Keerschturm, am kadhollische?!
Des wär ganz bschtimmt kaan drollische
Verkehrsuufall fer unser Stadt.
Mir hewwe jetz den Flugplatz satt.
Ich selwer hedd do nix degeje,
deed mer'n nooch Mannem ball verleje.

Beleischdung Hangäcker

Vor längerem hot d Stadt beschlosse,
den Weg im Dunkle net zu losse
do hinnerm Haseleise hinne,
wu mer die letschde Žcker finne
un der Weg ins Zentrum fihrt,
des, wu de Siide Rohrbachs ziert.
Mihsam lefft die Erwed dort
im wahre Schnecketempo fort.

D Hangäckerhoufbeleischdung, Leit,
des dauert jo e Ewischkeit!
Zwar sin die Kaawl schun verschtecklt,
die Gräwe randvoll zugedecklt,
awwer d Maschde fehle noch,
die braucht mer fer die Lampe doch!-
Stadt un Firma, sagt uns schnell,
wann werd's do drauß nachts endlisch hell?

Spielplatz Milleberg

D Stadt hot sich widder uffgerafft,
hot im Milleberg-Spielplatz gschafft.
In unserm Owwerdorf, die Kinner,
sin die wirklische Gewinner.
Ich muß de Stadt mein Dank ausschpresche,
sie zahlt am End jo aa die Zesche.

Plaschdinierer-Museum

Mer hot mir letschthii was zugetraare
- des soll ich do uff de Kerwe saare -
mir solle e dolles Museum krieje,
wu lauder Leischedeile drin lieje
un Mensche, plaschdisch un fescht verleimt.-
Vermut werd, daß do was Seltsams keimt.

Doch vor Kerwerplaschdinazione
sood mer meglischt uns verschone.
In Rohrbach wuhnt der Plaschdinierer.
Im Bosseldorn bosselt der Präparierer.
Mir hewwe kaan Platz meh. Zudem soll der Poschde
hunnertunzwanzisch Milliune koschde!

Radde un Marder

Radde un Marder, uhne Froog,
sin in Rohrbach längscht e Ploog,
laafe dags oft haufeweis
um die Schule rum im Kreis,
suche Fresse im Gebisch
im däglisch frisch gedeckde Disch.

Was Schiiler, haamlisch still un leise
aafach in die Hecke schmeiße,
des spott, uhne Iwwerdreiwung,
durchweg jeglischer Beschreiwung.
Eldern, sagt doch eire Kinner,
daß sie nix Eßbares hinner
Hecke un Vorgärde bringe,
dann kann de Kampf um d Ploog gelinge.-


Furukawa

E schlimmes Thema pack ich aa,
do hängt aa s Wohl vun Rohrbach draa.
Des lescht Johr hew ich des schun gschtreift.
Jetz hemmer was, wu kaans begreift
in Rohrbach - un sogar in Keersche:
Mir lewe unner Planungsnärrsche!
Des riesisch Fuchs-Waggon-Geländ
war bisher in Japanerhänd.
Jetz wär's verkaaft an "Houch un Dief"
in Frankfort.- Un do lefft was schief.

Do liggt fer uns de Has im Peffer.
Fer d Stadt war's sischer kaan Volltreffer!
Die hot, sou scheint's woll, iwwer Nacht
en vellisch neie Plan gemacht
un hot, entgeje bess'rem Wisse,
die Griifläsch aus de Planung gschmisse.
Die brauche mir als "Griini Lung"
un Bindeglied fer Alt un Jung.

Blouß um Regresse auszuschalde,
will die Stadt am Plan feschthalde,
will durch Schweije uuverdrosse
uff schoofli Art uns henke losse.
Mer hot uns, was mer jetz erscht spiirt,
bedräschtlisch an de Nas rumgfihrt,
hot verschproche - s isch zum Erbresche -
die Plän mit Rohrbach durchzuschpresche.
Nix isch bassiert! S Kind liggt im Brunne.

Mir hewwe uns vergeblisch gschunne
en neie Middlpunkt zu schaffe.
Jetz steh mer do wie bleede Affe
dank Stadtratsparlamentsbeschluß,
wuzu mer leider saare muß:
Die S P D - fraktionsbedingt -
hot Rohrbach schändlisch links gelinkt.
Un die annere Bardeie
brauche aa net laut zu schreie,
hewwe, weil sie sou gedrimmt,
groußdaals fer d Verwaldung gschtimmt.

All denne isch Reschpekt zu zolle,
wu's annerscht hewwe hawwe wolle.
Letschtendlisch war's zu gar nix nitz:
Der Plan isch durch - des isch en Witz!
Un werd sou, wie geplant, gebaut,
isch s Areal verhunzt, versaut.
Do draa zu denke fällt mir schwer.
Wuhii blouß mit dem ganz' Verkehr?
Zu dem Gelände gheere Bricke,
daß mir im Weschde net verschticke.
Baut endlisch die Sickinger Brick
zu Rohrbachs Wohl, zu Rohrbachs Glick!
Sou losse mir uns net vergeije.
Die nägschde Wahle werre's zeije!!!


S c h l u ß

Vum Rohrbacher Heimatlied, verfaßt vun unserm Ehremitglied
August Bechtel, singe mer jetz gemeinsam die Stroofe...(Musik ab).
Inzwische hot unser Kerwe-Käthsche uff em Rothaus-Fenschdersims Platz genumme, domit jedermann sieht, daß in Rohrbach
K E R W E
gfeiert werd.

Es gäb noch souviel zu verzähle,
doch alles hot emol e End.
Jetz wolle mer die Gorjl eele,
weil's jedem schun im Hals drin brennt.
Kummt uff de Kerweplatz mitnunner,
dort bei de Eichedorff'sche Hall!

Drei Däg geht's driwwer un geht's drunner,
sunscht werd doch unser Geld net all.
Wann Rohrbach halt sei Kerwe feiert,
isch immer alles uff de Fiiß.
S gibt gude Wei, net iwwerdeiert
un Weck un Worscht un Flaasch am Spieß.
Un fällt schun glei die Welt in Scherwe,
un zeigt sich aa die Zukunft stumpf:
Mir feiere in Rohrbach Kerwe.
Humor un Stimmung sin jetz Drumpf!

Jetz kann's lousgeh mit de Rohrbacher Traditionskerwe 2001 !


© 2001 by  Gustav Knauber, Heidelberg

 

mehr zur Kerwe 2001

  ©   by heidelberg-rohrbach.de,  info@heidelberg-rohrbach.de, Update: 13.05.04